काठमाडौं । पाँच तिब्बती शरणार्थीका नाममा फर्जी कागजातका आधारमा गैरकानुनी रूपमा ट्राभल डकुमेन्ट जारी गरेको आरोपमा परराष्ट्र मन्त्रालयका सहसचिव पुष्पराज भट्टराई पक्राउ परेका छन् ।
नेपाल प्रहरीको केन्द्रीय अनुसन्धान ब्यूरो (सीआईबी) ले जिल्ला अदालत काठमाडौंबाट जारी पक्राउ पुर्जीका आधारमा सोमबार उनलाई नियन्त्रणमा लिएको हो ।
सीआईबीका प्रमुख उमा चतुर्वेदीका अनुसार करिब १७ वर्षअघि पाँच तिब्बती शरणार्थीका नाममा गैरकानुनी रूपमा यात्रा अनुमतिपत्र (ट्राभल डकुमेन्ट) जारी गरिएको घटनाको अनुसन्धानपछि भट्टराईविरुद्ध राहदानी कसुरसम्बन्धी मुद्दा दायर गरिएको थियो ।
जिल्ला सरकारी वकिल कार्यालय काठमाडौंले गत सोमबार जिल्ला अदालत काठमाडौंमा मुद्दा दर्ता गरेपछि अदालतले पक्राउ पुर्जी जारी गरेको थियो। त्यसपछि सीआईबीले भट्टराईलाई पक्राउ गरेको हो ।
प्रहरीका अनुसार पक्राउ परेका भट्टराईलाई जिल्ला अदालत काठमाडौंमा उपस्थित गराई कानुनी प्रक्रिया अगाडि बढाइनेछ ।
